महाभारतम्-02-सभापर्व-037

आमन्त्रितानां सर्वेषां आगमनम्।। 1।।

वैशम्पायन उवाच।।	2-37-1x
तत आमन्त्रिता राजन्राजानः सत्कृतास्तदा। पुरेभ्यः प्रययुस्तेभ्यो विमानेभ्य इवामराः।।	2-37-1a 2-37-1b
ते वै दिग्भ्यः समापेतुः पार्थिवास्तत्र भारत। समादाय महार्हाणि रत्नानि विविधानि च।।	2-37-2a 2-37-2b
तच्छ्रुत्वा धर्मराजस्य यज्ञे यज्ञविदस्तदा। राजानः शतशस्तुष्टैर्मनोभिर्मनुर्षभ।।	2-37-3a 2-37-3b
बहु वित्तं समादाय विविधं पार्थिवा ययुः। द्रष्टुकामाः सभां चैव धर्मराजं च पाण्डवम्।।	2-37-4a 2-37-4b
स गत्वा हास्तिनपुरं नकुलः समितिञ्जयः। भीष्ममामन्त्रयाञ्चक्रे धृतराष्ट्रं च पाण्डवः।।	2-37-5a 2-37-5b
प्रयतः प्राञ्जलिर्भूत्वा भारतानानयत्तदा। धृतराष्ट्रं च भीष्मं च विदुरं च महामतिम्।।	2-37-6a 2-37-6b
दुर्योधनमुखांश्चैव भ्रातॄन्सर्वानथानयत्।।	2-37-7a
सत्कृत्यामन्त्रिताः सर्वे ह्याचार्यप्रमुखास्ततः। प्रययुः प्रीतमनसो यज्ञं ब्रह्मपुरस्सराः।।	2-37-8a 2-37-8b
धृतराष्ट्रश्च भीष्मश्च विदुरस्च महामतिः। दुर्योधनपुरोगाश्च भ्रातरः सर्व एव ते। गान्धारराजः सुबलः शकुनिश्च महाबलः।।	2-37-9a 2-37-9b 2-37-9c
अचलो वृषकश्चैव कर्णश्च रथिनां वरः। तथा शल्यश्च बलवान्बाह्लिकश्च महाबलः।।	2-37-10a 2-37-10b
सोमदत्तोऽथ कौरव्यो भूरिर्भूरिश्रवाः शलः। अश्वत्थामा कृपो द्रोणः सैन्धवश्च जयद्रथः।।	2-37-11a 2-37-11b
यज्ञसेनः सपुत्रश्च साल्वश्च वसुधाधिपः। प्राग्ज्योतिषश्च नृपतिर्भगदत्तो महारथः।।	2-37-12a 2-37-12b
स तु सर्वैः सह म्लेच्छैः सागरानूपवासिभिः। पार्वतीयाश्च राजानो राजा चैव बृहद्बलः।।	2-37-13a 2-37-13b
पौण्ड्रको वासुदेवश्च वङ्गः कालिङ्गकस्तथा। आकर्षाः कुन्तलाश्चैव गालवाश्चान्ध्रकास्तथा।।	2-37-14a 2-37-14b
द्राविडाः सिंहलाश्चैव राजा काश्मीरकस्तथा। कुन्तिभोजो महातेजाः पार्थिवो गौरवाहनः।।	2-37-15a 2-37-15b
बाह्लिकाश्चापरे शूरा राजानः सर्व एव ते। विराटः सह पुत्राभ्यां मावेल्लश्च महाबलः।।	2-37-16a 2-37-16b
राजानो राजपुत्राश्च नानाजनपदेश्वराः। शिशुपालो महावीर्यः सह पुत्रेण भारत।।	2-37-17a 2-37-17b
आगच्छत्पाण्डवेयस्य यज्ञं समरदुर्मदः। रामश्चैवानिरुद्धश्च कङ्कश्च सहसारणः।।	2-37-18a 2-37-18b
गदप्रद्युम्नसाम्बाश्च चारुदेष्णश्च वीर्यवान्। उल्मुको निशठश्चैव वीरश्चाङ्गावहस्तथा।।	2-37-19a 2-37-19b
वृष्णयो निखिलाश्चान्ये समाजग्मुर्महारथाः। एते चान्ये च बहवो राजानो मध्यदेशजाः।।	2-37-20a 2-37-20b
आजग्मुः पाण्डुपुत्रस्य राजसूयं महाक्रतुम्। ददुस्तेषामावसथान्धर्मराजस्य शासनात्।।	2-37-21a 2-37-21b
बहुभक्ष्यान्वितान्राजन्दीर्घिकावृक्षशोभितान्। तथा धर्मात्मजः पूजां चक्रे तेषां महात्मनाम्।।	2-37-22a 2-37-22b
सत्कृताश्च यथोद्दिष्टाञ्जग्मुरावसथान्नृपाः। कैलासशिखरप्रख्यान्मनोज्ञान्द्रव्यभूषितान्।।	2-37-23a 2-37-23b
सर्वतः संवृतानुच्चैः प्राकारैः सुकृतैः सितैः। सुवर्णजालसंवीतान्मणिकुट्टिमभूषितान्।।	2-37-24a 2-37-24b
सुखारोहणसोपानान्महासनपरिच्छदान्। स्नग्दामसमवच्छन्नानुत्तमागुरुगन्धिनः।।	2-37-25a 2-37-25b
हंसेन्दुवर्णसदृशानायोजनसुदर्शनान्। असम्बाधान्समद्वारान्युतानुच्चावचैर्गुणैः।।	2-37-26a 2-37-26b
बहुधातुनिबद्धाङ्गान्हिमवच्छिखरानिव। विश्रान्तास्ते ततोऽपश्यन्भूमिपा भूरिदक्षिणम्।।	2-37-27a 2-37-27b
वृतं सदस्यैर्बहुभिर्धर्मराजं युधिष्ठिरम्। तत्सदः पार्थिवैः कीर्णं ब्राह्मणैश्च महर्षिभिः। भ्राजते स्म तदा राजन्नाकपृष्ठं यथाऽमरैः।।	2-37-28a 2-37-28b 2-37-28c
।। इति श्रीमन्महाभारते सभापर्वणि दिग्विजयपर्वणि सप्तत्रिंशोऽध्यायः।। 37।।

टिप्पणी

2-37-8 ब्रह्मपुरस्सराः ब्राह्मणपुरस्सराः।। Template:Footer

Page is sourced from

sa.wikisource.org महाभारतम्-02-सभापर्व-037